Jinis Tembung Basa Jawa (paramasastra)

Tembung yaiku: perangane basa kang dumadi saka sawanda (wanda cacah siji) utawa luwih, sing wis mengku teges. wanda yaiku perangane tembung kang mung sakecap, dumadi saka aksara-aksara.

Tembung Aran

tembung aran yaiku tembung kang mratelakake/ nyebut jenenge barang utawa apa wae kang kaanggep barang. Titikane tembung aran yaiku: tembung aran lumrahe bisa kasambung karo tembung dudu, ana, nanging ora bisa kesambung karo tembung ora. Tembung aran lumrahe bisa diwiwiti tembung ing, menyang,tumrap. miturut lungguhing tembung ing ukara tembung aran bisa dadi jejer utawa lesan kanggo nuduhake cacahe, tembung aran dikanteni tembung wilangan.
Tembung kriya yaiku tembung kang mratelakake solah bawa utawa tandang gawe. Bisa mratelakake lakuning kaanan, tuladhane mlaku, mangan, adus, sinau, nandur lsp.
Titikanipun tembung kriya yaiku: 1.Lumrahe bisa sambung karo tembung ora/ anggone. 2.Bisa dikanteni tembung paling, luwih, banget. 3.Miturut lungguhing ing ukara, minangka wasesa (predikat).

1. Tembung Kriya Tanduk (Kata Kerja Aktif), Tembung kang jejer e (subjeknya) nindakake pakaryan utawa minangka pelaku. Titikane tembung kriya tanduk yaiku oleh ater-ater hanuswara : ny-, m-, ng-, n-. Tembung kriya tanduk kaperang dadi loro yaiku: Tembung kriya tanduk mawa lesan, lan Tembung kriya tanduk tanpa lesan
2. Tembung Kriya Tanggap (Kata Kerja Pasif), Tembung kriya tanggap yaiku tembung kang jejere minangka sasaran (penderita) Titikane yaiku tembung kriya tanggap oleh panambang tripurusa: dak-, ko-, di-

Tembung Kaanan

Tembung kaanan yaiku tembung kang mratelakake kepriye sipate utawa watake barang.

Titikane tembung kaanan yaiku:

1. Lumrahe kawiwitan tembung aran

2. Lumrahe bisa kasambung dening tembung luwi, rada, paling, banget.

Tembung Katrangan

Tembung katrangan yaiku tembung kang menehi katrangan marang tembung kriya, tembung wilangan utawa tembung liyane, kajaba tembung aran. Amarga yen nerangake tembung aran banjur dadi tembung kaanan. Perangane tembung katrangan kang kerep kanggone yaiku :

1. Tembung katrangan wektu / titi mangsa.
2. Tembung katrangan panggonan, kang baku ana telu, kene, kono, kana. Ana uga tembung katrangan panggonan kang ora genah dununge ing; ngendi-ngendi, mrana-mrana, saparan-paran.
3. Tembung katrangan nyata/ oraning tumindak. Kaperang ing antarane: a. Tembung katrangan kang mratelakake temene tumindak, b. Tembung katrangan kang mratelakake rangu-rangu ning tumindak, c. Tembung katrangan kang mratelakake tambuhing tumindak, d. Tembung katrangan kang mratelakake pangajabing tumindak.Ing sajroning ukara tembung katrangan kaanan ing tumindak lumrahe dikantheni tembung anggone. Perangane tembung katrangan kang kerep kanggone yaiku :
4. Tembung katrangan kaananing tumindak tegese tembung kang nuduhake kepriye lakuning wasesaning ukara, kepriye anggone nyambut gawe, lan kepriye oleh-olehing tumindak.

Tuladhane:

Banget, luwih, kurang, ethok-ethok, kejaba, mulane, akeh, bebarengan, ora sepira, age-age, alon-alon, wae, timen, gek, semu, selak, lsp.